Memli Krasniqi shpall kandidaturën për kreun e PDK-së

Këshilli Drejtues i Partisë Demokratike është mbledhur pak ditë para mbajtës së Konventës ku do të zgjidhet kryetari i i ri i këtij subjekti.

Ndërkaq, Memli Krasniqi ka zyrtarizuar kandidaturën për kreun e PDK-së.

Në deklaratën e shpalljes së kandidaturës së tij për kryetar të ardhshëm, Krasniqi ka thënë se PDK ka nevojë për të hapur një kapitull të ri, një projekt politik për qytetarin e Kosovës.

“Më 3 korrik, do të kemi një proces demokratik zgjedhor për Kryetarin e PDK-së. Duke qenë krenar me rrugëtimin tonë për Kosovën, dhe duke ndier përgjegjësinë e madhe që kemi për të ardhmen, unë kam vendosur që të kandidoj për të udhëhequr PDK-në. Jam plotësisht i bindur që së bashku do ta ndërtojmë profilin dhe ekipin që na duhet, për t’i dhënë Kosovës dhe qytetarëve të saj një adresë të mirëfilltë politike, për të cilën ata kanë shumë nevojë. Jam më se i vendosur që së bashku ta çlirojmë potencialin e demokracisë, meritokracisë dhe përkushtimit, që PDK-ja të jetë derë e hapur për gjithësecilin që don dhe ka çfarë t’i japë vendit, shoqërisë dhe institucioneve shtetërore”, ka thënë Krasniqi.

Ai tha se përtej një subjekti politik, Partia Demokratike e Kosovës është projekt madhor kombëtar e identitar që i ka dhënë fizionominë lirisë, pavarësisë dhe shtetit  sovran.

Ndërkaq, emrat më të përfolur që mund ta vazhdojnë drejtimin e PDK-së janë edhe: Enver Hoxhaj, që aktualisht është u.d. i kryetarit, ish-ambasadorja e Kosovës në ShBA, Vlora Çitaku dhe ish-ministri i Shëndetësisë, Uran Ismaili.

Përpos këtyre katër emrave, është përmendur edhe nënkryetari i Kuvendit nga PDK, Bedri Hamza.

Hoxhaj ka bërë të ditur se të gjitha kandidaturat e mundshme për kryetar do të dorëzohen me shkrim në grupin punues të partisë, për të cilën tha se ka më së shumti potencial për ta udhëhequr Kosovën.

Pos tjerash ka theksuar se nga e hëna do të mendojë për kandidaturën e tij për kreun e PDK-së.

“Nuk është gara mes nesh, sepse PDK-së i duhet pushteti në nivel qendror, pasi qeveria aktuale e zotit Kurti, e cila është autoritare dhe po e dëmton çdo ditë vendin. Ku keni dëgjuar në Evropë në 70 vjetët e fundit i cili kur pyetet për një dokument të administratës amerikane thotë se ende nuk e kam lexuar, më leni ta lexojë, mund të shihni se çfarë mendimi kanë. Prandaj për mua është një javë vendimtare dhe prej të hënës të mendoj për kandidaturën”, ka thënë Hoxhaj.

Ai shtoi se Konventa e re zgjedhore duhet të reflektojë pritjet e anëtarësisë dhe strukturave të PDK-së.

Në anën tjetër ish-ambasadorja Vlora Çitaku përshëndeti vendimin e PDK-së për mbajtjen e zgjedhjeve të brendshme.

“PDK ka bërë hapin e duhur sonte duke vendosur për të shkuar në zgjedhje për lidershipin e partisë. Lajm jashtëzakonisht i mirë”, shkroi Çitaku, duke mos përmendur fare nëse do t’i hyjë kësaj gare.

E dy emrat e tjerë që janë përmendur Memli Krasniqi dhe Uran Ismaili nuk është që janë deklaruar rreth kësaj çështje.

PDK ka njoftuar se kandidatët që synojnë të kandidojnë për kryetar duhet që të shpall kandidaturën e tyre më së largu me 1 korriku dhe duhet të ketë 50 nënshkrime të delegatëve nga 818 sa ka gjithsej konventa.

Konventa për zgjedhjen e kryetarit të ri të PDK-së do të mbahet më 3 korrik. /Telegrafi/