Bordi i Drejtorëve të Postës aprovon planin e biznesit për 2021-2023, thotë se janë reduktuar shpenzimet e stafit deri në 30 për qind

Sot në mbledhjen e Bordit të Përkohshëm të Drejtorëve të Postës së Kosovës, është aprovuar Plani i Biznesit për vitin 2021-2023.

Në njoftim thuhet se për shkak të gjendjes së rëndë financiare dhe pamundësisë së arkëtimit në Biznes Planin e aprovuar sot nga Bordi, janë harmonizuar pagat e gradave nga 17 deri 8, ndërsa shpenzimet e stafit janë reduktuar nga 6% deri në 30%.

“Nga ky planifikim i reduktimit të shpenzimeve të stafit, Posta e Kosovës ka kursyer rreth 300 mijë euro vjetore”, thuhet në njoftim.

Bordi ka vlerësuar se kjo është një masë e domosdoshme por përkohshme deri në tejkalimin e situatës së pandemisë, ndërsa harmonizimi i gradave do të rishikohet kohë pas kohe, varësisht nga përmirësimi i gjendjes do të vlerësohen gradat e Menaxhmentit të Lartë dhe të Mesëm, duke pasur parasysh ngritjen e të hyrave dhe forcën e likuidititetit.

“Bordi i Përkohshëm i Drejtorëve, ka kërkuar motivim shtesë nga Menaxhmenti për të ngritur të hyrat dhe përmirësuar rezultatin financiar të Postës së Kosovës”, thuhet më tej. /Telegrafi/