Policia tregon emrat e terroristëve iranianë që kishin si synim kryerjen e një sulmi në Tiranë

Drejtori i përgjithshëm i Policisë së Shtetit, Ardi Veliu së bashku me drejtorin e Drejtorisë së Antiterrorit, Gledis Nano, në deklaratë për media, treguan për parandalimin e një sulmi terrorist që do të kryhej në Tiranë, kundër xhihadistëve të MEK, opozitës iraniane që strehohet në Shqipëri.

Sipas njoftimit të policisë, një celulë aktive terroriste e njësisë së operacioneve të jashtme të forcave QUDS iraniane është zbuluar së fundmi nga Institucionet Shqiptare të Sigurisë, e cila është përgjegjëse për aktin terrorist gjatë kremtimeve të Festës së Nevruzit, të frekuentuar nga anëtarë të nivelit të lartë të organizatës opozitare iraniane Mujahedeen el Khalq (MEK), plan që u parandalua nga masat e shtuara të Policisë së Shtetit.

“Celula terroriste drejtohet nga operativi i Forcave QUDS, i njohur si PEYMAN. PEYMAN është rezident i përhershëm në Iran dhe menaxhon në distancë një numër operativësh në Shqipëri dhe në vende të tjera në Evropën Qendrore dhe Perëndimore. Një nga këta operativë është Alireza NAGHASHZADEH, një iranian i cili është vetë një ish-anëtar i MEK-ut dhe zotëron një pasaportë austriake. Një tjetër operativ, është Abdolkhalegh MALEK ZADEH, një iranian që jeton në Turqi dhe që ka drejtuar celulën operacionale”, thuhet në njoftimin për media, përcjell Telegrafi.

Lexo po ashtu Do kryenin akt terrorist ditën e Nevruzit në Tiranë, policia zbulon grupin iranian

Operativët kriminelë, me bazë në Ballkan, që janë vartës të TURGUT-it ose të një trafikanti droge turk të lidhur me të, nga viti 2018, janë dërguar në Shqipëri për të avancuar planifikimin e sulmeve kundër MEK-ut, siç ishte diktuar nga MALEK ZADEH dhe Forcat QUDS.

“Autoritetet shqiptare i kanë identifikuar këta individë dhe informacioni i siguruar nga informatorë nga brenda organizatave kriminale i ka lejuar autoriteteve shqiptare që të parandalojnë planin e marsit 2018 dhe planifikimet eventuale për sulme nga figurat e krimit të organizuar që kishin si objektiv MEK-un për llogari të regjimit iranian. Institucionet shqiptare të sigurisë po punojnë vazhdimisht për të ndalur këto tentativa për sulm”, përfundon njoftimi.

Këta janë të arrestuarit nga ana e Policisë së Shtetit:
1. PEYMAN – nuk jepen të dhëna të tjera
2. Abdolkhalegh MALEK ZADEH, i datëlindjes 21 prill 1979, njihet si “Ferhat”
3. Erwin ARAM, i datëlindjes 13 korrik 1974, njihet si “Alireza NAGHASHZADEH”
4. Abdulselam TURGUT, i datëlindjes 27 maj 1967 /Telegrafi/