Prokuroria e Gjilanit kërkon paraburgim për të dyshuarit që u kapën me drogë

Prokuroria Themelore në Gjilan, Departamenti për Krime të Rënda, ka paraqitur kërkesë për caktimin e masës së paraburgimit, ndaj të dyshuarve F.TH. (1974), XH.H. (1961), dhe L.M. (1962), për shkak të dyshimit se kanë kryer veprën penale “Posedimi, shpërndarja dhe shitja e paautorizuar e narkotikëve, substancave psikotrope ose analoge”.

Në njoftimin e Prokurorisë thuhet se “ekziston dyshimi i bazuar se, të dyshuarit F.TH., XH.H. dhe L.M., më 24 janar 2019, në rrugën Prishtinë – Gjilan, pa autorizim kanë blerë dhe poseduar substanca narkotike, me qëllim të shitjes apo shpërndarjes, në atë mënyrë që pasi nga policia është ndalur automjeti, të cilin e drejtonte i dyshuari F.TH., në të cilin automjet kishte qenë edhe i dyshuari XH.H., në bagazhin e të njëjtit është gjetur 52.37 kg, substancë narkotike e llojit Marihuanë”, përcjell Telegrafi.

“Ndërsa, tek parkingu i qendrës tregtare ETC, në Gjilan, nga policia është arrestuar edhe i dyshuari L.M., i cili kishte për të pranuar substancën narkotike, e cila edhe është konfiskuar nga policia. Po ashtu, janë konfiskuar edhe dy vetura, 4 telefona celular dhe 2,000 euro”.

“Gjithashtu, Departamenti për të Mitur, ka paraqitur kërkesë për caktimin e masës së paraburgimit, ndaj të miturit A.I. (2001), për shkak të dyshimit se ka kryer veprën penale ‘Posedimi i paautorizuar i narkotikëve, substancave psikotrope ose analoge’ nga neni 273 paragrafi 1 dhe 5 të KPRK-së”.

Sipas Prokurorisë, dyshohet që, i mituri A.I., më 25 janar 2019, në Viti, ka poseduar substancë narkotike, të llojit Marihuanë, në peshë prej 108.6 gram, e cila është konfiskuar nga policia.

“Prokuroria, i ka propozuar gjyqtarit të procedurës paraprake, që të dyshuarve dhe të miturit t’iu shqiptojë masën e paraburgimit, me qëllim të sigurimit të kushteve sa më normale për zhvillimin e procedurës penale”, thuhet në njoftimin e Prokurorisë. /Telegrafi/

Foto: Ilustrim