Hoxha takon ambasadoren e Suedisë, kërkon përkrahje për hapat tjerë për procesin integrues

Ministrja e Integrimit Evropian, Dhurata Hoxha, ka pritur në takim, ambasadoren e Suedisë në Kosovë, Karin Hernmack, me të cilën diskutoi për marrëdhëniet e shkëlqyera në mes të dy vendeve dhe informoi për fushatën për liberalizimin e vizave dhe masat për zbatimin e MSA-së.

Sipas një njoftimi, ministrja Hoxha vlerësoi lartë përkrahjen e fuqishme nga Suedia, edhe me rastin e votimit të fundit në Parlamentin Evropian, por, theksoi ministrja, ne kemi ende nevojë për përkrahje në përshpejtimin e hapave për procesin integrues.

“Angazhimi ynë për liberalizimin e vizave është i pandalshëm, fushata jonë tashmë ka filluar. Suedia ka vlerësuar dhe po e vlerëson angazhimin tonë për liberalizimin e vizave, të arriturat por edhe sfidat tona në procesin integrues, andaj, presim të kemi përkrahje për lëvizjen e lirë dhe përshpejtimin e procesit integrues”, theksoi Ministrja, duke vënë në pah edhe zbatimin e reformave të duhura për procesin integrues si masat e ndërmarra në kuadër të MSA-së.

Ndërkaq, siç thuhet më tej, ambasadorja Hernmack shprehu respekt për punën që zhvillohet rreth liberalizimit të vizave dhe procesit integrues, duke përgëzuar angazhimin e Ministres Hoxha dhe institucioneve të Republikës së Kosovës. Ajo ka theksuar se do të mbështes fuqishëm përkushtimin e deritashëm të paraardhësit të saj, për arritjen e aspiratave të qytetarëve të Kosovës drejt familjes evropiane.

“Ambasadorja vuri në dukje po ashtu se është e lumtur që do ta ketë rastin e thellimit të marrëdhënieve të deritashme të shkëlqyera ndërmjet dyja vendeve, në veçanti tash, kur Kosova gjendet në prag të liberalizimit të vizave. Suedia, theksoi znj. Hernmack, qëndron dhe do të qëndroj krah qytetarëve të Kosovës, duke ofruar edhe përkrahje për liberalizimin e vizave dhe procesin integrues”, thuhet në njoftim. /Telegrafi/