Ministri Ismaili: Harrojeni Emergjencën e vjetër, ajo po transformohet për shërbime të dinjitetshme për qytetarët

Ministri i Shëndetësisë, Uran Ismaili, ka treguar se rinovimi i Klinikës së Emergjencës në QKUK dhe blerja e pajisjeve të reja të cilat kanë munguar për një kohë të gjatë aty, është drejt përfundimit.

Si një ndër klinikat ku kërkojnë ndihmë më së shumti pacientë gjatë ditës, Emergjenca për një kohë të gjatë ishte lënë pas dore.

Tani, me këtë investim kapital, në këtë klinikë do të nisin ndryshimet për ofrimin e shërbimeve më adekuate për qytetarët.

Ministri Ismaili ka treguar se janë ndërruar dyert, dritaret, është krijuar pritore e re për pacientë, janë blerë pajisje të reja, dhe brenda pak ditësh kjo klinikë do të transformohet tërësisht nga ajo që ka qenë.

“Besoj se ju kujtohet klinika e vjetër e Emergjencës në QKUK. Dhomat e vjetruara, pa pajisje adekuate, dyer që nuk hapen, korridoret pa stola dhe pritore të mirëfillta? Ato pamje nuk do t’i shihni më aty. Puna për transformimin e kësaj klinike po shkon drejt përfundimit. Dyer, pritore dhe pajisje të reja, që kanë munguar prej vitesh, për shërbime të dinjitetshme ndaj qytetarëve tanë”, ka shkruar ministri Ismaili në Facebook. /Telegrafi/