Qeveria e RM-së: Plani 3-6-9 është rrumbullakësuar në afatin e paraparë

Në përfundimin e muajit të nëntë, Qeveria i rrumullakëson reformat nga Plani 3-6-9. Pjesa më e madhe e aktiviteteve për të cilat është kompetente Qeveria, janë kryer. Mbetet vetëm përfundimi i procedurës në Kuvend për propozimet e fundit pvr ndryshime dhe plotësim të disa zgjidhjeve ligjore, gjë që mbetet të përmbyllet deri në mesin e muajit të ardhshëm, informojnë nga Shërbimi për shtyp i Qeverisë së Maqedonisë.

Nga Qeveria theksojnë se reformat në kuadër të Planit 3-6-9 janë përmbyllur në afatin e paraparë dhe i kanë përshpejtuar proceset e integrimit të Republikës së Maqedonsië drejt BE-së dhe NATO-s.

“Në ditën e sotme rrumbullakësohet periudha e paraparë për realizimin e projekteve urgjente reformatore të Qeverisë së Republikës së Maqedonisë, Planit 3-6-9, që u promovua më 5 korrik të vitit 2017, vetëm 1 muaj pas fillimit me punë të Qeverisë aktuale. Plani 3-6-9 ishte projekt për kthim të shpejtë në proceset euro-atlantike, rimëkëmbje të funksioneve të institucioneve pas krizës politike dhe për nisjen dhe zbatimin e reformave në fushat kyçe që dolën nga raportet e grupit të ekspertëve të lartë të Reinhard Priebe dhe konkluzat e negociatave të Përzhinos”, thuhet në kumtesën e Qeverisë./Telegrafi/