Me daljen e AKR-së nga koalicioni LAA, a po i hapet rrugë krijimit të institucioneve?

Më shumë se dy muaj pas mbajtjes së zgjedhjeve dhe një muaji pas certifikimit të rezultatit  zgjedhor, partitë politike ende nuk po gjejnë një gjuhë të përbashkët për zgjedhjen e kryeparlamentarit, pastaj formimit të qeverisë.

Periudhën e fundit është lakuar disa herë nëpër media një marrëveshje e mundshme në mes koalicionit PAN dhe AKR-së, por kjo është demantuar nga vet Pacolli siç ka thënë ai “Nuk ka pasur asnjëherë marrëveshje në mes palëve”.

Megjithatë sot ka pasur risi në këtë drejtim.

Sekretari i Aleancës Kosova e Re, Rrahim Pacolli konfirmoi për Telegrafin largimin e tyre nga koalicioni parazgjedhor LAA, pa dhënë përgjigje shtesë se a do të bëhen bashkë me koalicionin PAN.

“Partia do të vendosë”, ka thënë ai.

Ndërkaq, Partia Demokratike e Kosovës i ka shpeshtuar mbledhjet e kryesisë. Këtë e ka konfirmuar për Telegrafin edhe nënkryetari i PDK-së, Enver Hoxhaj.

Ai tha se takimi i cili do të zhvillohet sot ka si temë diskutimi konstituimin e Kuvendit dhe formimin e Qeverisë.

“Takimi i sotëm ka për temë konstituimin e Kuvendit dhe formimin e qeverisë si dhe për organizmin e partisë për zgjedhjet lokale”, ka thënë Hoxhaj.

Mbledhja e Kryesisë së PDK-së, pritet të mbahet sot në ora 16:00, bëjnë të ditura burimet e Telegrafit.

Ndryshe, për të gjashtën herë me radhë më 24 gusht ka dështuar zgjedhja e kryeparlamentarit dhe nënkryetarëve të Kuvendit, pas zgjedhjeve të jashtëzakonshme të cilat u mbajtën më 11 qershor. /Telegrafi/