Erdogan: Shqipëria të pastrojë territorin nga elementët që kërcënojnë Turqinë

Presidenti i Turqisë, Recep Tayyip Erdogan, ka pritur me një ceremoni shtetërore homologun e tij shqiptar, Bujar Nishani, i cili ndodhet për një vizitë zyrtare në Turqi, ku Erdogan ka cituar fjalët e Ataturkut “Ne popullin shqiptar e duam, e quajmë si vëlla, nuk e shohim atë larg vetes tonë.”

Erdogan ka thënë se është e drejta të kërkohet që Shqipëria të pastrojë territorin e saj nga elementët të cilët janë kërcënim për Turqinë.

“Është e drejta jonë të kërkojmë që Shqipëria të pastrojë territorin e saj nga elementët të cilët janë kërcënim për Turqinë. Jemi në bashkëpunim me policinë e Shqipërisë në luftën kundër terrorizmit dhe për sigurinë. Vendi jonë është duke dhënë përvojën dhe kontributin e tij ndaj policisë së Shqipërisë në luftën kundër terrorizmit. Në këtë fushë zhvillojmë trajnime të ndryshme. Këto trajnime do të vazhdojnë edhe në të ardhmen”, tha Erdogan.

Ai ka njoftuar se gjatë takimit me Nishanin kanë folur, siç tha ai edhe për organizatën terroriste Feto si dhe luftën kundër saj.

“Unë e falënderoj personalisht dhe në emër të popullit tim për ndihmën e dhënë ndaj nesh në lidhje me këtë çështje”, ka theksuar ndër të tjera Erdogan dhe ka shtuar se në takimin kokë më kokë, kanë pasur mundësi të bisedojnë për shumë çështje si politike, të sigurisë, ekonomike, tregtare dhe kulturore.

Erdogan në vijim të fjalës së tij vuri në dukje se janë të kënaqur nga puna që po bën Shqipëria në fushën e sigurisë.

“Ndihma dhe bashkëpunimi jonë për modernizimin, pamjen ndërkombëtare dhe trajnimin e ushtrisë së Shqipërisë do të vazhdojë edhe në të ardhmen. Ndjekim nga afër punën e Shqipërisë në drejtim të integrimit drejt BE-së dhe shpresojmë që në përfundim të këtyre hapave të hedhur në reformën për drejtësi të anëtarësohet në Bashkimin Evropian. Shqipëria është një vend, i cili luan një rol kyç në stabilitetin e Ballkanit. Ne mendojmë që Shqipëria do të ndikojë për mirë në BE. Mbështesim gjithashtu nismat e Shqipërisë në politikën e jashtme, ku mund të veçojmë këtu punën për normalizimin e marrëdhënieve me Serbinë”, tha ai.

Duke folur për këmbimet tregtare, Erdogan tha se brenda një kohë të shkurtër dëshirojnë që shkëmbimet tregtare mes dy vendeve të shkojnë të paktën 1 miliardë dollarë.

Ndërsa për sa i përket pranisë së shqiptarëve në Turqi, Presidenti Erdogan ka thënë se qytetarët e Turqisë me origjinë shqiptare janë një vlerë dhe pasuri kulturore për Turqinë. Ai shprehu kënaqësinë për aktivitetet e Qendrës Kulturore “Sami Frashëri” në Ankara dhe Institutit “Yunus Emre” në Tiranë dhe Shkodër.

Erdogan në vijim të fjalës së tij ka prekur edhe çështjen e Kosovës, duke vënë në dukje se Turqia do të vazhdojë të mbështesë Kosovën në anëtarësimin e saj në organizmat ndërkombëtare dhe ato rajonale dhe shtoi se javën e ardhshme ai do të ketë kënaqësinë të presë Presidentin e Kosovës Hashim Thaçi.

Presidenti Erdogan shtoi se gjatë takimit me Thaçin do të ketë mundësi të bisedojë nga afër në lidhje me këto çështje.

Ndërkohë duke shprehur miqësinë dhe dashamirësinë për shqiptarët me një thënie të Mustafa Kemal Ataturkut, Erdogan tha “Ne popullin shqiptar e duam, e quajmë si vëlla, nuk e shohim atë larg vetes tonë.”