Anketë me qytetarët: 61 për qind e tyre janë kundër ratifikimit të demarkacionit

Demarkacioni i tillë siç është nuk duhet të kalojë. Këto janë rezultatet e një ankete e cila për dy javë ka qëndruar në Agjencinë e Lajmeve KosovaPress.

Sipas rezultateve të kësaj ankete, 61 për qind e votuesve i kanë thënë “Jo” këtij ratifikimi; 32 për qind janë përgjigjur me “Po”, dhe me opsionin e tretë “Nuk e di”, janë pozicionuar 7 për qind.

Pasditen e datës 26 gusht 2015, në Vjenë të Austrisë, u nënshkrua marrëveshja e shumë përfolur për demarkacionin Kosovë – Mali i Zi.

Me atë ditë, Republika e Kosovës mëtohej të kishte përmbyllur procesin e demarkacionit me shtetin malazez, pasi që nënshkroi në Vjenë Marrëveshjen për Kufirin Shtetëror.

Por një gjë e tillë solli një mori problemesh e bllokadash për politikën dhe institucionet në vend.

Opozita e bashkuar, kundërshtoi fuqishëm nënshkrimin e kësaj marrëveshje, duke shprehur pakënaqësinë dyshimin për faljen e territorit të Kosovës.

Ndërkohë që edhe banorët e pjesës së goditur të Komunës së Pejës thanë se me këtë marrëveshje Kosova ka humbur mijëra hektarë tokë në kufirin me Malin e Zi. Edhe ekspertët në bazë ta hartave deklarojnë se Kosova me këtë demarkacion humb rreth 9000 hektarë.

Megjithatë, edhe përkundër kundërshtive, marrëveshja u nënshkrua.

Lexo po ashtu Demarkacioni s’do të përmbyset, do të korrigjohet

Për palën kosovare nënshkrimin e dha zëvendëskryeministri i parë dhe ministri i Jashtëm, Hashim Thaçi, dhe ministri i Brendshëm, Skender Hyseni, ndërsa për palën malazeze, zëvendëskryeministri dhe ministri i Jashtëm, Igor Llukshiq, dhe ministri i Brendshëm, Rashko Konjeviq.

Dëshmitarë të nënshkrimit ishin kryeministri i Kosovës, Isa Mustafa, kryetari i Malit të Zi, FillipVujanoviq, si dhe ministri i Jashtëm i Austrisë, Sebastian Kurz.

Zëvendëskryeministri dhe ministri i Jashtëm i Kosovës, Hashim Thaçi, pas nënshkrimit të marrëveshjes pati thënë se marrëveshja është në “përputhje të plotë me Kushtetutën e vitit 1974, Dokumentin e Presidentit Ahtisaari dhe Kushtetutën e Republikës së Kosovës”.

Ndërkohë në një draft-raport të Komisionit Shtetëror për Shënjimin dhe Mirëmbajtjen e Kufirit Shtetëror Kosovë-Mal i Zi, të cilin e kishte siguruar KosovaPress, për demarkacionin me Malin e Zi, thuhej se: “Kufiri ndërmjet Republikës së Kosovës me Malin e Zi fillon prej tre-kufirit Kosovë, Shqipëri dhe Mal i Zi, me lartësi mbidetare 2366 metra dhe vazhdon deri te tre-kufiri tjetër Kosovë, Mal i Zi dhe Serbi, në lartësi mbidetare 2155 metra”.

“Kufijtë e Kosovës janë të përcaktuar me Kushtetutën e Krahinës Socialiste Autonome të Kosovës (KSAK) të vitit 1974, sipas së cilës, kufijtë administrativë brenda RSFJ janë shndërruar në kufijtë ndërkombëtarë dhe kjo është duke u zbatuar në këtë proces”, thuhej në këtë raport.

Ndërsa Qeveria e Kosovës nuk pati provuar të diskutojë më gjatë në Kuvend për këtë çështje, por pati miratuar raportin e Komisionit Shtetëror për shënjimin e vijës kufitare me Malin e Zi.

Pas aktit të nënshkrimit, opozita parlamentare në Kosovë kundërshtoi fuqishëm ratifikimin e demarkacionit, duke organizuar protesta të mëdha në Prishtinë, siç ishin ato të nëntorit, dhjetorit e janarit, për të vazhduar edhe me grevën në qendër të kryeqytetit.

Tri partitë opozitare, Vetëvendosje, AAAK dhe Nisma, organizuan edhe nënshkrimin e një peticioni dhe e dërguan te Presidentja, me mbi 200 mijë nënshkrime të qytetarëve lidhur me kundërshtimin ndaj asociacionit dhe demarkacionit.

As seancat e Kuvendit nuk kaluan qetë, shumë prej tyre u përcollën me gaz lotsjellës dhe arrestime të deputetëve të opozitës nga ana e policisë dhe sigurimit të Kuvendit.

Presidentja e Kosovës, Atifete Jahjaga përveç iniciativës së dështuar për të mbledhur liderët e të gjitha partive në një tryezë të përbashkët diskutimi, mblodhi një ekip prej tre ekspertësh ndërkombëtarë duke krijuar një komisioni “ad-hoc” për rishikimin e përcaktimit të kufirit Kosovë-Mali i Zi. As vlerësimi I ekspertëve, nuk ndryshoi qëndrimin e opozitës.

Rezultatet e bisedimeve dhe tentim zbutjes së opozitës, nuk dhanë ndonjë zgjidhje të ngërçit politikë.

Në forma të ndryshme u shtynë debatet dhe në Kuvend nuk pati mundësi as të votohej tutje çështja përfundimtare e vijës kufitare me Malin e Zi.

Së fundmi, edhe liberalizimi i vizave për kosovarët është lidhur ngushtë me çështjen e ratifikimit të kësaj marrëveshje në Kuvend, për çka ende opozita nuk po pajtohet. Një gjë e tillë nuk i është kërkuar asnjë vendi ballkanik.

Kroacia nuk e ka zgjidhur demarkacionin me Serbinë dhe është në kontest ndërkombëtar me Slloveninë, por kjo nuk e ka penguar BE-në ta pranoj si anëtare me të drejta të plota në Bashkimin Evropian.

Ndërkohë, Kryesia e Kuvendit të Kosovës ka miratuar kërkesën e deputetit Shpejtim Bulliqi, e cila ka marrë nënshkrimin e 24 deputetëve të tjerë, që në Kuvend të zhvillohet një debat rreth çështjes së demarkacionit me Malin e Zi. Për këtë propozim, u mblodh Kryesia e Kuvendit dhe u vendos që debati të zhvillohet më 3 gusht.

Dakordimin për këtë debat e ka konfirmuar edhe kryetari i Kuvendit, Kadri Veseli.

Kryekuvendari tha se tryeza e rrumbullakët, në të cilën do të marrin pjesë deputetët që e kanë nënshkruar, por edhe të tjerë, do të zhvillohet në sallën alternative të Kuvendit.

Debati do të mbahet nesër, më 3 gusht në ora 10:00.