Kuvendi miraton Raportin vjetor të RTVM për vitin 2015

Kuvendi i Republikës së Maqedonisë sot në pjesën e pasdites të seancës 103 e miratoi Raportin vjetor të RTVM për vitin 2015, transmeton Telegrafi Maqedoni.

Në akuzat e opozitës që RTVM për vitin 2015 ka realizuar më pak të hyra për sa i përket reklamave, kryetarja e Këshillit programor të RTVM, Snezhana Klinçarova, deklaroi se shërbimi kombëtar nuk guxon të emetojë reklama në “prime time”, përpos në transmetime, xhirime integrale dhe të ngjashme. Siç ka thënë Klinçarova, kjo vjen si pasojë se gjatë vitit 2015 nuk ka pasur ngjarje të rëndësishme sportive.

Marjanço Nikilov nga LSDM ka kontestuar rejtingun e shërbimit publik, i cili sipas tij është katastrofë, për shkak të, sipas tij, raportimit të pa balancuar në dobi të pushtetit.

Sipas Raportit vjetor të NP Radiotelevizioni i Maqedonisë, shërbimi publik gjatë vitit të kaluar ka realizuar fitim në vlerë prej 51.700.382 denarë si rezultat i harxhimeve më të vogla dhe përqindjes së zmadhuar (75,8) të pagesës së taksës për radiodifuzion./Telegrafi/