Madonna profetike

Prishtinë-Budvë-Jaz-Budvë-Prishtinë. Si gjithmonë kontradiktore - edhe në koncertin e saj të fundit pop ylli botëror Madonna nuk ka harruar ta lejë publikun e pranishëm të çuditur/habitur me mesazhet e saja publike/politike. Tamam në formën e një profeteje globale Madonna përmes ekraneve të mëdha të instaluara në skenën e Jazit dërgoi sinjale të fuqishme mbi atë sesi bota duhet urgjentisht të ndryshojë. Ajo nuk e la pa i futur hundët edhe në garën presidenciale amerikane ku foton e republikanit John McCain e shoqëroi me fjalët “Get Stupid” kurse imazhi i demokratit afro-amerikan Barack Obama dilte çdo herë kur paraqitej slogani “Change We Need”. Reklamë pa pare e Madonnas për Obaman – mbase kjo do ndikojë që shqiptarët ta duan edhe më shumë Madonnan.

Gjergj Filipaj
filipaj@gmail.com

Budvë, 25 shtator — Madonna Luise Ciccone u paraqit të enjten mbrëma para publikut në plazhin Jaz të Budvës mu ashtu siç e ka kuptimin emri i saj artistik – Nëna e Profetit dhe lajmëtarit të ndryshimeve në botë (lexo:Shën Maria nëna e Jezu Krishtit). Koncerti i Madonnas në Jaz në radhë të parë ka shërbyer si një tribunë e instaluar kundër zhvillimeve aktuale globale, si ai zëri i përndritur i arsyes njerëzore kundër globalizimit të kulturave të ndryshme apo thënë më mirë amerikanizimit të botës (edhepse Madonna në fakt është vetë një lloj nusprodukt i globalizmit).

Imazhet e Nënës Terezë, Dalaj Lamës dhe Mahatma Ghandit, John Lennonit e Bob Geldofit koncertit i kanë dhënë atë aromën e dashurisë/lirisë/paqes kolektive botërore duke e bërë plazhin Jaz një lloj mini vendi-homazh të lëvizjeve të viteve 60’-70’.

Aroma e dashurisë është përhapur edhe me prezantimin kohë pas kohe të “lakuriqur” të Madonnas – një gjë që pritej nga ajo edhepse koncerti u mbajt në Malin e Zi paksa patriarkal i cili viteve të fundit përmes promovimit të Budvës po tenton që të hyjë në listën e top destinimeve turistike botërore me të gjitha gjërat në meny – përfshirë këtu edhe se(ks)nsualitetin e trupit femëror. Gjë që nuk ka munguar në Jaz ku në koncert ka pasur ekzemplarë të nivelit të lartë sidomos nga ish-republikat jugosllave.

Por nejse kjo gjendje “seksualistike” pritej në koncertin e Madonnas e cila edhepse e mban emrin e Nënës së Krishtit jo rrallëherë është kritikuar (pothuajse çkishëruar) nga Kisha Romake Katolike. Por megjithëkëtë mbrëmë disa nga simbolet e religjioneve monoteiste zënin një vend të rëndësishëm në simbolikën e koncertit të saj në Budvë.

Kënga hit e vitit 1989 “Like a Prayer” shoqëronte Kryqin e katolikëve e ortodokseve, Gjysmë Hënën e myslimanëve dhe Yllin e Davidit të hebrenjve duke i dhënë një element “iluminues” – kontaktues me perëndinë e tyre të preferuar – Madonnan të afro 80 mijë (mbase jo të gjithëve) pjesëmarrësve në koncertin e Jazit.

Por të enjten mbrëma në plazhin Jaz të Budvës Madonna ka qenë e vetmja që ka pasur ndikimin më të gjerë mbi masën e mbledhur qoftë psiqikisht a fizikisht – publiku ishte me Madonnan dhe Madonna ishte me publikun – komentet e tjera shtesë me të vërtetë do të ishin të tepërta.

Megjithëkëtë repertori i këngëve të interpretuara nga Madonna ka qenë më se i kënaqshëm për publikun e uritur për këngët e saja. Kombinimi i hiteve të vjetra me disa këngë të albumit të fundit “Hard Candy” ka prezantuar Madonnan në dritën më të mirë. Këngët “Human Nature”, “Vogue”, “La Isla Bonita, “Like a Prayer”, e kthyen publikun mbrapa në kohë duke kujtuar Madonnan e inspiruar nga erotika dhe trupi i lakuriqur i femrës. Ndërsa këngët e reja e prezantuan Madonnan në shkëlqimin e plotë së saj (Madonna dukej e bukur dhe seksi edhe pse ajo në fakt është një grua 50-vjeçare).

Nuk duhet harruar pa përmendur edhe Robyn – këngëtaren suedeze të zhanrit alternative/electro pop e cila i dha shkëndija natës së Jazit duke e nxehur kështu publikun para daljes në skenë të mbretëreshës së popit – Madonnas.

Koncerti i Madonnas në Jaz përfundoi ashtu edhe si u nis – turmat e njerëzve të mbledhur u larguan qetësisht nga koncerti pa shkaktuar tollovi të panevojshme në komunikacion edhepse numri i madh i njerëzve shkaktoi vështirësi në rrugëtimin nga Jazi në Budvë. Madonna do qëndrojë në Budvë deri më 27 shtator në njërën nga suitat e hotelit Splendid. Ajo pas largimit nga Budva do niset për në Athinë ku do e mbajë koncertin e fundit në Evropë- ndërsa turneu i saj më pas vazhdon në Amerikën Veriore.

Kosovarët e pranishëm në koncert

Në mesin e pjesëmarrësve në koncertin e Madonnas nuk kanë munguar as edhe shqiptarët nga të gjitha trojet etnike. Numri më i lartë i shqiptarëve u shënua nga ata të Shqipërisë (rreth 1.200) të cilët në Budvë kanë ardhur të organizuar me autobusë. Nuk kanë munguar edhe shqiptarët e Kosovës (rreth 300) të cilët kanë ardhur përmes 2 aranzhimeve grupore por edhe me makina individuale.

“Spo besoj se jam këtu duke ndigju Madonën”, tregon Albina Syla 26-vjeçe nga Gjilani e cila ndodhej në Jaz. Ajo u nda e kënaqur me koncertin dhe jo vetëm me mbretëreshën e popit por edhe me Robyn –e cila e argëtoi publikun për gati afro një orë. Ndërsa Betim Mehmeti nga Prishtina – i cili ndodhej në Jaz për të parë Madonnan i shoqëruar nga e dashura e tij tha se “po kaloj perfekt ska ma mirë”. Sipas kosovarëve të pranishëm ndjenjën e kalimit perfekt në koncertin e Madonnas mund ta ketë prishur paksa rruga e gjatë nga Prishtina deri në Budvë e cila në fakt ka qenë rraskapitëse.