Të gjesh çelësin e suksesit të fotografisë edhe në Kosovë

Vlerësimi që bota e artit fotografik ka bërë dhe bën për fotografin Fadil Berisha, i cili i tregoi Amerikës shqiptarët e bukur, na ngjall një krenari të natyrshme për bashkëkombësin tonë dhe na nxit që të këtë figurë të shquar ta bëjmë të njohur gjerësisht në Kosovë dhe dashamirët e këtij arti të përfitojnë nga krijimtaria e tij artistike.

Veç faktit se është i përzgjedhuri ekskluziv i modeleve dhe manifestimeve të bukurisë në botë, Berisha shpreh entuziazmin e tij, për përkrahje Akademisë Evolucion, në Prishtinë.

Gjithmonë i respektueshëm dhe modest, Fadili na njofton për planet e tij.

Çka ju bëri që të pranoni këtë ftesë, më konkretisht?

Fadil Berisha: Me kënaqësi pranova ftesë për të dhënë kontributin tim në një shkollë të tillë të vetmen në rajon, në gjuhën shqipe. Akademia e profilit të tillë, guximi i stafit për të hapur një shkollë që kërkon mund të madh dhe sakrificë të madhe ekonomike, karakteri i punës me studentë, më ngacmoi dëshirën e kamotshme, që diturinë dhe përvojën time të kem mundësi t’ua jap të rinjve të vendit tim.

Cila është perspektiva e studentëve që mbarojnë Fotografinë dhe Fashion Design?

Fadil Berisha: Studentët perspektivën së pari duhet ta shohin në Kosovë. Janë drejtime shumë tërheqëse dhe të reja që të japin mundësi për punë. Ndërsa, më të mirët do t’i kenë të hapura dyert edhe jashtë Kosove.

A ka mundësi që ndonjëri nga këta studentë të gjej punë në SHBA?

Fadil Berisha: Po. Akademia Evolucion veç ka marrëveshje me disa shkolla të njohura në Itali, ku mund të vazhdohet masteri, ndërsa për në SHBA do të shohim mundësinë që më të suksesshmit të kenë mundësinë e kontaktit me shkolla të njohura. Cilësia t’i hap dyert vet.

Di që keni pasur plane sërish për të ardhur në Kosovë, a bëhet fjalë për ndonjë datë të afërt?

Fadil Berisha: Unë jam gjithë kohës në lëvizje dhe kam jashtëzakonisht shumë pak kohë të lirë. Tani që flas me juve jemi duke bërë seleksionimin e vajzave nga Kosova për “Ford Supermodel Of The World”, që do të mbahet këtë muaj në Prishtinë.

Ok, Fadil faleminderit për intervistën dhe shpresoj të ju shohim sa më shpejt në Kosovë.

Fadil Berisha: Dhe unë ju falënderoj dhe ju përshëndes te gjithëve. Ju dua shumë!

Telegrafi