​Pacolli dënon gjuhën antisemitiste në Kosovë

Zëvendëskryeministri i parë dhe shefi i diplomacisë kosovare, Behgjet Pacolli, ka dënuar ashpër gjuhën e përdorur me përmbajtje antisemitiste ndaj popullit dhe shtetit izraelit, nga një kandidat i një subjekti politik për kryetar komune në Republikën e Kosovës.

“Marrëdhëniet në mes popullit shqiptar të Republikës së Kosovës dhe atij izraelit kanë qenë gjithherë të shkëlqyeshme dhe për këtë më së miri e dëshmon historia. Gjuha dhe deklaratat me përmbajtje urrejtëse dhe elemente të forta antisemitiste janë të papranueshme dhe duhet të dënohen jo vetëm nga Institucionet zyrtare të Republikës së Kosovës, por nga çdo qytetar ordiner”, ka thënë Pacolli.

Ai ka theksuar se Kosova dhe populli i saj gjithherë kanë qenë shembull i tolerancës ndër-etnike dhe ndër-fetare dhe kjo frymë duhet të vazhdojë edhe në të ardhmen.

Pacolli i ka uruar Vitin e Ri “Rosh Hashanah” popullit hebrenj gjithandej nëpër botë dhe Bashkësisë Hebraike të Kosovës, duke i dëshiruar një vit të mbarë, ku paqja, respekti, dhe harmonia të mbizotërojnë.