Xhelili: EULEX-i ta informojë Kuvendin

EULEX-it pritet që t’i bëhet kërkesë zyrtare që të informojë Komisionin për Punë të Brendshme, Siguri dhe Mbikëqyrjen e FSK-së për gjendjen në veri të Kosovës. Anëtari i Komisionit nga radhët e PDK-së, Fatmir Xhelili ka deklaruar për Telegrafin se është Kuvendi i Kosovës që ka miratuar angazhimin e EULEX-it për të shërbyer si institucioni kryesor përgjegjës për sigurinë në këtë pjesë problematike të vendit, prandaj duhet që ky mision ta informojë Kuvendin.

Gjatë mbledhjes së Komisionit për Punë të Brendshme dhe Siguri të mbajtur dje, deputeti Xhelili kishte vlerësuar se informimi nga institucionet e sigurisë vendase dhe ndërkombëtare është më se i nevojshëm për shkak se në veri të Kosovës është tensionuar shumë situata, që mund të jetë edhe pasojë e procesit të bisedimeve Kosovë-Serbi.

Xhelili ka deklaruar për Telegrafin se do të angazhohet që Komisioni të dërgojë një kërkesë zyrtare në adresë të misionit evropian.

“Pres që pas marrjes së kërkesës zyrtare, EULEX të reflektojë. Qëllimi jonë nuk është që të bëhemi tutorë, por thjesht vlerësojmë se misioni evropian duhet të informojë institucionet tona për situatën në veri”, ka deklaruar Xhelili.

Sipas tij, për të përmirësuar situatën e sigurisë duhet që të ketë një bashkëpunim më të mirë ndërmjet EULEX-it dhe Policisë së Kosovës.

“Siguria atje është e ndërlidhur edhe me çështje politike, dhe në këtë aspekt edhe EULEX nuk mund të fajësohet plotësisht. Ndërkohë, në strukturat e Policisë së Kosovës që janë aktivë në pjesën veriore të Kosovës ka mjaft oficerë që kanë vullnet për të përmirësuar gjendjen e sigurisë, edhe pse llogaritet që një pjesë e oficerëve nga komuniteti serb nuk janë edhe aq të interesuar”, ka thënë Xhelili.

Duke komentuar deklaratën e kryetarit ilegal të Mitrovicës, Kërstimir Pantic, se KFOR dhe EULEX duhet të largohen dhe t’i lënë përgjegjësitë të ashtuquajturës “Mbrojtja Civile”, deputeti Fatmir Xhelili ka deklaruar se kjo është vetëm një taktikë për të synuar legalizimin e kësaj organizate ilegale që vepron në këtë pjesë.

Xhelili deklaron se kjo duket një përpjeke e dëshpëruar, për shkak se Serbia do të obligohet për të shpërbërë strukturat ilegale të sigurisë në veri të Kosovës.

Ditëve të fundit është tensionuar situata në pjesën veriore të Kosovës. Ndërsa incidenti më serioz ishte hedhja e një mjeti shpërthyes në një banesë në Lagjen e Boshnjakëve në Mitrovicë, gjatë të cilës u lënduar dy fëmijë. I dyshuar për këtë sulm është një i ri i nacionalitetit serb. /Telegrafi/