0Shares

Stanislas Wawrinka dhe Rafael Nadal do të ndeshen sërish me njëri-tjetrin në finalen e një turneu “Grand Slam”, këtë radhë në Roland Garros.

Spanjolli, i cili synon titullin e 10 në këtë turne, do të kërkojë hakmarrjen ndaj zviceranit për humbjen në finalen e Australian Open të vitit 2014.

Nadal mundi në gjysmëfinale të riun Dominic Thiem me rezultatin 3-0. Nadal, i cili nëse fiton turneun do të jetë numri 2 i botës, kishte gjithnjë një marsh më shumë sesa austriaku, i cili nuk e kishte shkëlqimin e ndeshjes me Novak Djokovic. Thiem u duk mirë vetëm në fillimin e ndeshjes, teksa fitoi menjëherë një “game” me shërbimin e Nadalit, por 31-vjeçari iu kundërpërgjigj shumë shpejt duke marrë edhe frenat e lojës në dorë, për të mbyllur setet 6-3, 6-4 dhe 6-0.

Kjo e Roland Garros me Wawrinkën do të jetë finalja e 22 në turnetë Grand Slam për Nadal, i cili ndy  raste ka mundur ta fitojë turneun parizien pa humbur asnjë set: në vitin 2008 dhe në vitin 2010, transmeton Top Channel.

Ndërsa Wawrinka mundi në gjysmëfinale Andy Murray me rezultatin 3-2, duke marrë hakun për humbjen e pësuar nga britaniku vitin e kaluar. Ishte një ndeshje maratonë ajo Wawrinka-Murray, që u mbyll pas katër orë e 34 minutash lojë, me suksesin e zviceranit që bëhet tenisti më i vjetër në moshë që luan finalen e Roland Garros që pas Nikki Pilic, i cili në vitin 1973, në moshën 33-vjeçare luajti përballë Ilie Nastasse.

Murray mori kryesimin 2-1 në këtë ndeshje, teksa fitoi setin e parë dhe të tretë 7-6 dhe 7-5, ndërkohë që Wawrinka fitoi të dytin 6-3.

Në setin e katërt dhe të pestë ishte zvicerani ai që shkëlqeu, teksa i fitoi këto fraksione 7-6 dhe 6-1, për të siguruar finalen e tij të katërt “Grand Slam” në karrierë.

Të Ngjajshme

Portali Telegrafi ka kënaqësinë t'u ofrojë forum të lirë për komente dhe diskutim. Fyerjet dhe përdorimi i fjalëve banale, do të pasoj me përjashtim të menjëhershëm nga komentimi. Ju lutem lexoni rregullat këtu.

Shfaq Komentet (0)