Rahoveci afër befasisë, Trepça mezi mposhtë “Vreshtarët”

KB Rahoveci ka shfaqur një performancë fantastike ndaj Trepçës për plot me lojtarë të huaj, por kjo nuk mjaftoi që të mposhten mitrovicasit. Ndeshja përfundoi me rezultat 79-73.

Dueli ishte i barabartë nga fillimi i takimit, kurse periudha e vetme ku Trepça dominoi ishte periudha e dytë, ku u krijua epërsia prej dhjetë pikësh.

Në fillim të pjesës së dytë epërsia shkoi në 15 pikë, por Rahoveci u kthye duke prekur fitoren, por Trepça në fund iku me një fitore të ngushtë, duke aplikuar të gjithë lojtarët e huaj, ndaj KB Rahovecit të promovuar për herë të parë në histori në Superligë me të gjithë lojtarë vendorë.

I shkëlqyer ka qenë Mustafë Merovci me 31 pikë e pesë kërcime, pasuar nga Muhamed Hasani me 17 pikë e tetë asistime. Që të dy lojtarët luajtën minuta të plota.

Krahas tyre shkëlqeu edhe djaloshi fenomenal nga Rahoveci, qendra Besnik Sharku, me 8 pikë, 8 kërcime dhe 4 asistime në vetëm 23 minuta lojë dhe ishte i pandalshëm në çerekun e katërt duke treguar kualitete edhe për përfaqësuese, aty ku mungon një qendër kualitative vendore.

Te Trepça ishte Ljujic më i miri përcjellë nga Wise me 11 pikë.

Trepça të hënën përballet me Feni Industries në një takim shumë të vështirë në Ligën Ballkanike. /Telegrafi/