0Shares

Në punimet e sotme të Konventës së VI-të të PDK-së është diskutuar edhe rreth profilit të partisë, me ç’rast delegatët janë përcaktuar për profilizimin si parti e qendrës së djathtë.

Ndryshe, pa kundërkandidat dhe me votim të hapur është rizgjedhur dhe për një mandat katërvjeçar si kryetar i Partisë Demokratike të Kosovës, kryetari i deritashëm i PDK-së, Hashim Thaçi.

Pas rizgjedhjes si kryetar i PDK-së, Thaçi tha se partia e tij do t’i fitojë zgjedhjet lokale dhe nacionale.

“Unë sot nuk kam ndonjë premtim të madh, por dua vetëm t’ju siguroj për diçka. Unë si kryetar i PDK-së, bashkë me lidershipin që do të udhëheqë PDK-në, ju sigurojmë dhe garantojmë fitore në zgjedhjet e ardhshme lokale dhe nacionale”, theksoi Thaçi.

Ai po ashtu foli “për një qeverisje edhe më të mirë në të ardhmen dhe më efikase, me qëllim që qytetarët e këtij vendi të ndihen mirë dhe të jenë krenarë”!

Në Konventën e Partisë Demokratike janë dhënë propozimet për Këshillin Drejtues të kësaj partie, kurse në mesin e të propozuarve janë edhe Fatmir Limaj e Jakup Krasniqi. Lista për anëtar të Këshillit Drejtues pritet të zhvillohet pas pak çastesh, shkruan KP.

Siç dihet ish-ministri i Transportit, Fatmir Limaj, nuk ka pasur mundësi të jetë prezent në konventën e partisë, për shkak se ai po mbahet në paraburgim me akuzën për keqpërdorimet në ministri. Ndërsa, kryetari i Kuvendit të Kosovës, Jakup Krasniqi, nuk ka dashur të marrë pjesë në punimet e konventës, derisa në një letër publike drejtuar opinionit është shprehur se do të njoftojë me kohë për veprimet e tij në të ardhmen.

Ndryshe, që të dy këto figura kanë qenë më kritikët ndaj lidershipit aktual të partisë, lidhur me zhvillimet në parti, por edhe në qeverisje. /Telegrafi/

Portali Telegrafi ka kënaqësinë t'u ofrojë forum të lirë për komente dhe diskutim. Fyerjet dhe përdorimi i fjalëve banale, do të pasoj me përjashtim të menjëhershëm nga komentimi. Ju lutem lexoni rregullat këtu.

Shfaq Komentet (0)