Ndërtohet skema si ndodhi ekzekutimi i dyfishtë në Sukth të Durrësit

Ngjarja e rëndë në autostradën Tiranë-Durrës, ku u vrarë Ervin Dalipaj dhe Juxhin Dauti, ka qenë e ngjashme me një skemë filmi. Ata janë ndjekur dhe janë qëlluar në makinën e tyre tip “Audi”.

Mësohet se ish-shefi i krimit ekonomik në Tiranë, Ervin Dalipaj, prej kohësh në arrati, i akuzuar për rrëmbimin, torturimin dhe vrasjen e Gazmend Çollakut po lëvizte me një makinë “Audi” së bashku me mikun e tij, Juxhin Dauti, në momentin që një makinë e zezë i ka ndjekur nga pas.

Të dyja mjetet lëviznin me shpejtësi marramendëse në rrugën e vjetër Tiranë-Durrës, ndërsa atentatorët qëllonin me breshëri kallashnikovi në drejtim të Dalipajt e mikut të tij. Në një moment, siç raporton “News24”, të dyja mjetet kanë qenë paralel dhe ecnin me shpejtësi.

Lexo po ashtu Atentat me dy viktima në Durrës, vetura bëhet “shoshë” nga plumbat (Video)

Automjeti është qëlluar me breshëri kallashnikovi, ndërsa gjurmët e plumbave janë të dukshme në pjesën e përparme dhe sidomos në pjesën e shoferit. Si pasojë e shpejtësisë së lartë dhe të shtënave pa pushim, automjeti ka përfunduar në autostradë tejet i dëmtuar, madje i kanë dalë edhe gomat.

Sipas burimeve policore, si Dauti ashtu edhe Dalipaj kanë mbetur të vdekur në vend. Sipas një dëshmitari në vendngjarje, një fshatar që punonte tokën automjeti i zi është larguar në drejtim të Shajakut.

Policia ndodhet ende në vendngjarje dhe po mbledh gëzhojat për të kuptuar nëse ka pasur apo jo shkëmbim zjarri mes dy makinave. E gjithë zona prej 1 km në rrugën e vjetër Tiranë-Durrës nuk lejohet për qarkullimin e mjeteve apo njerëzve, pasi hetimet në vendngjarje vijojnë. Policia po kontrollon edhe subjektet aty pranë nëse kanë kamera që t’ju vijnë në ndihmë për të rënë në gjurmët e atentatorëve.