0Shares

Mbrëmë në Shtetet e Bashkuara te Amerikës (SHBA), është ndarë nga jeta artisti, profesori dhe akademiku i muzikës, Xhevdet Bakraqi.

Ai ka qenë njëri prej themeluesve të Shoqërisë Kulturoro Artistike (SHKA) “Vëllezërit Bakraqi”,  udhëheqës shumëvjeçar i SHKA “Ramiz Sadiku” në Pejë, si dhe ka qenë pjesë e pandashme kontributeve për SHKA “Sofra Pejane”.

“Me vdekjen e Xhevdet Bakraqit, vdiq edhe një copëz e Pejës”, është shkruar në mes tjerash në faqen e Facebook-ut të SHKA ‘Sofra Pejane’.

Për vdekjen e Bakraqit ka reaguar edhe miku shumëvjeçar i tij, këngëtari i mirënjohur, Ramadan Krasniqi  – Dani, i cili ka thënë në profilin e tij në Facebook, se “iku edhe një kolos i pazëvendësueshëm i muzikës pejane”.

Profesorin Bakraqi e ka kujtuar me dhembje edhe ish-nxënësi i tij, klarinetisti i njohur nga Peja, Sead Muqa – Sei.

Xhevdet Bakraqi, ka shërbyer si drejtor i Shkollës së Muzikës në Pejë dhe si udhëheqës i SHKA-ve të ndryshme të qytetit në vitet e okupimit, duke qëndruar i palëkundur në organizimin e sistemit paralel arsimor.

Në një nga intervistat e tij të fundit, dhënë për emisionin “Top Folk” të gazetarit Fitim Behluli, i ndjeri Xhevdet Bakraqi suksesin dhe arritjen e tij ia kishte dedikuar babait, familjes e veçanërisht qytetit të Pejës. “Peja ka zemër të madhe, Peja ka dhënë muzikë të madhe, ne veç e kemi trasuar atë”, ishte shprehur ai.

Orkestrina ‘Vëllëzërit Bakraqi’ Foto-kujtim, Shibenik-Dalmaci, vitet ’70-të (nga e majta)-Gjelal Bakraqi, Haki Trakaniqi, Nagip Gjikolli, Ramadan Krasniqi-Dani, Xhevdet Bakraqi, Zija Dresha, Muharem Berisha dhe Nexhmedin Bakraqi

Ndryshe, Bakraqi akademinë muzikore e kishte kryer në Sarajevë dhe ishte ndër kuadrot e njohura të Pejës dhe Kosovës në vitet 80-të.

Ceremonia lamtumirëse për të ndjerin Xhevdet Bakraqi pritet të zhvillohet në SHBA ku edhe ka jetuar në vitet e fundit të jetës.

Vëllai i Xhevdetit, Xhelal Bakraqi, është njëri nga tenorët më të njohur shqiptar, i cili jeton dhe vepron në Suedi tash e disa vite./Telegrafi/

Të Ngjajshme

Portali Telegrafi ka kënaqësinë t'u ofrojë forum të lirë për komente dhe diskutim. Fyerjet dhe përdorimi i fjalëve banale, do të pasoj me përjashtim të menjëhershëm nga komentimi. Ju lutem lexoni rregullat këtu.

Shfaq Komentet (0)