Londra është e kaltër (Video)

Chelsea ka shënuar fitore me rezultat 2-1 ndaj Arsenalit në derbin e Londrës të zhvilluar në Stamford Bridge.

Ndeshja nga minuta e parë ishte e jashtëzakonshme. Rreshjet e mëdha të borës në Londër nuk penguan aspak që ndeshja të jetë e një intensiteti të lartë.

Arsenali e kishte mundësinë e parë në këtë takim, por Giroud nga një pozitë ideale dështonte të shënonte.

Menjëherë në sulmin e radhës, pas një fauli ta paakorduar të Ramires, ishte Hazard që me një pasim fantastik e gjeti të lirë Juan Matan që pa problem shënoi për 1-0 dhe gëzimin e tifozëve vendas.

Në vazhdim Chelsea dominoi totalisht, duke u shfaqur tejet rrezikshëm para portës. Ramires u gjend papritmas i vetmuar në zonë, por atë nga goli e ndali Wojciech Sczesny që u ndëshkua me karton të verdhë për ndërhyrjen e tij.

Nga pika e bardhë i ftohtë si akulli u tregua Frank Lampard, i cili (16’) shënoi për 2-0 dhe epërsinë solide të Chelseat.

Me këtë rezultat mbaroi dhe pjesa e parë, ndërsa në pjesën e dytë ndryshoi takimi.

Arsenali i është qasur më mirë pjesës së dytë. Një pasim të hatashëm të Santi Cazorlas më së miri e shfrytëzoi Theo Walcott, i cili realizoi për 2-1 me mjeshtri, për të kthyer në lojë Arsenalin (58’).

Arsenali sulmon dhe disa herë u gjend pranë golit, por edhe Chelesa ishte pranë golit të tretë me anë të Fernando Torres dhe më pas edhe me anë të Demba Bas, i cili dështoi të shënonte në portën e zbrazët.

Në fund një gjuajtje të lirë nga afërsia në mënyrë mjeshtrore e ekzekutoi Thomas Vermaelen, por goditja nuk përfundoi në portë.

Me këtë fitore Chelsea ka 45 pikë në vendin e tretë, kurse Arsenali mbetet në vendin e gjashtë me 34 pikë. Lideri Manchester United i ka 45 pikë dhe i shkon Tottenhamit në derbin tjetër të kësaj jave në Ligën Premier. /Telegrafi/