Lekaj: Ata që po akuzojnë nuk japin zgjidhje, Haradinaj kryeministër

Deputeti i zgjedhur nga radhët e Aleancës për Ardhmërinë e Kosovës, Pal Lekaj ka thënë se partia e tij dhe koalicioni PAN nuk merret me akuzat që po i vijnë nga Lëvizja Vetëvendosje dhe koalicioni LAA, se po e bllokojnë vendin.

Lekaj ka thënë se këta që sot po bëjnë akuza nuk po ofrojnë zgjidhje për vendin.

“Ne nuk merremi me askënd se çfarë ata janë në gjendje të akuzojnë. Njerëzit që akuzojnë sot janë po ata që dje akuzonin të tjerët për bllokada përmes kryesuesit. Pra ata krejt çka dinë të bëjnë është, të akuzojnë. Asnjëherë nuk kanë dhënë diçka për t’i ofruar zgjidhje këtij vendi”, ka thënë deputeti i AAK-së, për lajmi.net.

I pyetur hipotetikisht se a do të mund të ketë tërheqje të Haradinajt nga kandidatura për kryeministër, ai ka thënë se politika merret me situata reale, duke shtuar se lideri i AAK-së shumë shpejt do të jetë edhe zyrtarisht kryeministër.

“Pyetjet hipotetike nuk mund t’iu japësh përgjigje, sepse politika merret me situata reale. Në situatën çfarë jemi, z.Haradinaj se shpejti do të jetë edhe zyrtarisht kryeministër i Kosovës”, ka përfunduar Pal Lekaj.

Pas një takimi që patën sot përfaqësuesit e partive politike me kryesuesin e seancës, Adem Mikullovci u vendos që të mërkurën pësëri të zhvillohet një takim konsultativ.