Jansa beson se statusi i Kosovës do të zgjidhet deri në qershor

Kryeministri i Sllovenisë, Janez Jansa, ka deklaruar se beson që Bashkimi Evropian do të jetë në gjendje ta zgjidh çështjen e Kosovës deri në qershor, respektivisht gjatë kryesimit slloven me BE.

"Është e rëndësishme që BE-ja të tregojë së është e gatshme të reagojë dhe t’i dërgojë një sinjal të fuqishëm gjithë rajonit, në veçanti Serbisë, se ekziston perspektiva evropiane”, ka thënë Jansa në një intervistë për gazetën “Mond”.

Lidhur me paralajmërimin e BE-së për dërgimin e misionit në Kosovë, gjë të cilën e kundërshtojnë Serbia dhe Rusia, Jansa ka thënë se, “gjatë muajve në vijim duhet të ndërmarrim hapa konkret për ta mundësuar këtë mision dhe të gjejmë mënyra për ta ndihmuar stabilitetin ekonomik të rajonit”.

Ai po ashtu ka thënë se duhet pasur vëmendje të posaçme për fqinjët e Kosovës, e sidomos Maqedoninë, një pjesë e madhe e banorëve të se cilës janë shqiptarë.

Jansa ka vlerësuar se kundërshtimi i Serbisë ndaj misionit evropian “nuk është befasi”, por ka shtuar se nuk pret që Serbia të ndërmarrë ndonjë operacion ushtarak.