Haradinaj flet për bashkëpunimin me Pacollin (Video)

Kandidati për kryeministër nga koalicioni PAN, Ramush Haradinaj, premton se vonesa e formimit të Qeverisë së Kosovës, do të arsyetohet.

“Tash e kemi një bazë me të gjerë të zhvillimeve nga z. Pacolli, prandaj edhe kjo vonesë do të arsyetohet”, tha Haradinaj në Prizren për RTV Besa.

Sipas tij, formimi i Qeverisë së Kosovës, do të ndodhë brenda 10 ditësh.

“Qeveria e ardhshme do të jetë e përgjegjshme për obligimet që do t’i marrë”, tha Haradinaj.

Ai premtoi se pas formimit të Qeverisë, do të fillojë ndryshimi në Kosovë.

Haradinaj ka thënë se do t’i përvishen punës “dhe do ta kthejnë për së mbari vendin”.

Kur është pyetur për vendime të mëdha dhe konkretisht për themelimin e Asociacionit të Komunave me shumicë Serbe, Haradinaj ka thënë se “nuk i kemi ato vendime në tavolinë, kemi aspekte të tjera të punës që i kemi urgjent, e që është zhvillimi ekonomik, rendi e ligji”.

Haradinaj sot së bashku me partnerët e koalicionit, Kadri Veselin dhe Fatmir Limajn u takuan me Ukë Rugovën, djalin e presidentit historik, Ibrahim Rugovës.

Për këtë takim nuk janë dhënë ende detaje.