LAJMI I FUNDIT:

Bashkëpunim i mirë mes komunës, policisë dhe KFOR-it në Mitrovicë

Bashkëpunim i mirë mes komunës, policisë dhe KFOR-it në Mitrovicë
-->

Bashkëpunimi i deritashëm ndërmjet Komunës së Mitrovicës, KFOR-it dhe policisë, është vlerësuar lart sot gjatë një takimi mes kryetarit Agim Bahtiri, komandantit të Detashmentit të Përbashkët Rajonal-Veri të KFOR-it, kolonel Martin Schuler, si dhe komandantit të stacionit jugor të policisë, kapiten Ahmet Gjosha.

Që të tre bashkëbiseduesit u dakorduan se në të gjitha rastet, bashkëpunimi ndërmjet këtyre institucioneve në të mirë të qytetarëve të Mitrovicës dhe në shërbim të tyre, ka qenë shumë i mirë, efikas dhe i suksesshëm.

Kësaj radhe, në fokus të bisedës ishte angazhimi i përbashkët për inspektimin dhe në rast nevoje edhe meremetimin e urës dytësore mbi lumin Sitnicë, afër urës kryesore në hyrje të tunelit, para restorantit “Vila Lux”.

Komandanti Schuler tha se është e nevojshme që kësaj ure, të ndërtuar nga KFOR-i t’i bëhet një inspektim nga ekspertët dhe në bazë të vlerësimeve të tyre, të ndërmerren masa për meremetimin e saj eventual.

“Ekspertët tanë, bashkë me ata të FSK-së, por nën mbikëqyrjen e KFOR-it, do të bëjnë inspektimin e urës, për të parë gjendjen e saj nga aspekti i sigurisë. Nëse ekspertët konstatojnë se janë të nevojshme aktivitete për renovimin e saj, atëherë ne jemi të gatshëm ta bëjmë këtë. Për inspektimin e urës është e domosdoshme që ajo të ndalohet për qarkullim dy ditë radhazi, ndërsa po qe i nevojshëm meremetimi i saj, atëherë duhen më shumë ditë, prandaj jemi këtu që të kërkojmë mendimin dhe mbështetjen tuaj, në mënyrë që bashkërisht ta kryejmë këtë punë”, tha Schuler.

Ndërsa, kryetari i Komunës Agim Bahtiri dhe komandanti i Stacionit jugor të policisë, Ahmet Gjosha, mirëpritën iniciativën e KFOR-it për inspektimin dhe meremetimin eventual të urës së lartpërmendur.

Ata thanë se janë të gatshëm në çdo kohë, kur KFOR-i vendos të veprojë në këtë drejtim, të përmbushin kërkesat që kanë për krijimin e kushteve për inspektim dhe renovim të urës nëse ka nevojë.