Ahmetaj: Rritja ekonomike për 2017 3.5%

Për ministrin e Financave Arben Ahmetaj rritja ekonomike në vitin 2017 do të jetë brenda pritshmërive, pra, 3.5 për qind. Duke folur për performancën e ekonomisë për vitin 2016, ai tha se ekonomia ka reflektuar reformat e thella të tre viteve të fundit.

“Rritja ekonomike tre mujoret e parë të 2016 shënoi shifrat 3.3 për qind. Ekonomia ka përcjellë një periudhë të vështirë për shkak të keqmenaxhimit”, tha Ahmetaj.
Për ministrin edhe të dhënat e janarit 2017 janë optimiste, ku të ardhurat e tatimeve, doganave dhe sigurimet janë mbledhur 29.9 miliardë lekë, krahasuar me 29.1 miliardë me të njëjtën periudhë të një viti më parë.

Sa i përket kredive ministri tha se ka një rritje të kreditimit të individëve, dhe një ulje të numrit të kredive të këqija.
“Nga kredia më në fund kemi lajme të mira, pas dy vjetësh. Tek individët është shumë serioze, shumë e konsiderueshme rritja. Tek korporatat sigurisht që jemi në terrenin pozitiv të rritjen së kredisë, po sigurisht që jemi në nivele akoma larg asaj që do të kontribuonte drejt për së drejti në rritjen ekonomikë dukshëm”, tha Ahmetaj. /Telegrafi/