0Shares

Agjentët e lojtarëve po rezultojnë si ‘padronët’ e vërtetë të botës së futbollit dhe kjo duket nga shifrat marramendëse që ata përfitojnë nga lëvizjet në afatet kalimtare të klientëve të tyre.

Sipas një studimi të FIFA-s, që monitoron të gjitha tratativat nëpërmjet sistemit TMS, përfaqësuesit e lojtarëve që nga 2013 e deri tani kanë mundur të sigurojnë 1 miliard euro fitime vetëm nga funksioni i tyre si ndërmjetës në bisedimet mes lojtarëve dhe klubeve të interesuar.

Madje, viti 2016 është përkufizuar si viti i artë i agjentëve, duke qenë se fitimet e tyre pësuan një rritje me 34%.

Nga studimi i FIFA-s rezulton se në vitet e fundit, 98% e 1 miliard eurove është shpenzuar nga klubet evropiane, kontinenteve të tjera u mbetet vetëm kuota prej 2%. Studimi i FIFA-s jep me detaje fitimet e agjentëve të lojtarëve duke nisur nga viti 2013 e deri tani, ku vlera më e lartë është pikërisht ajo e vitit 2016, me 368 milionë euro.

Po kështu, të dhënat e FIFA-s tregojnë se klubet që pasurojnë më shumë agjentët e lojtarëve janë ata të kampionatit anglez dhe atij italian. Në fakt, Liga Premier është e paarritshme, pasi në 4 vitet e fundit skuadrat e kësaj lige kanë investuar për agjentët e lojtarëve 381.3 milionë euro. Ndërsa në Itali, fitimet e përfaqësueseve të futbollistëve kanë kapur vlerën e 256.3 milionë eurove. Shumë prapa në këtë pikë kanë mbetur Gjermania, Portugalia, Spanja dhe Franca, shkruan tch.

Është edhe një e dhënë tjetër që meriton të studiohet. Në 4 vitet e fundit janë kryer 10875 operacione në afatet kalimtare. Në 1291 raste agjenti i futbollistit ka përfaqësuar edhe klubin që e ka blerë atë, në 238 tratativa agjenti ka përfaqësuar futbollistin dhe klubin që e ka shitur dhe në 105 raste, të tre palët kanë pasur të njëjtin agjent.

Të Ngjajshme

Portali Telegrafi ka kënaqësinë t'u ofrojë forum të lirë për komente dhe diskutim. Fyerjet dhe përdorimi i fjalëve banale, do të pasoj me përjashtim të menjëhershëm nga komentimi. Ju lutem lexoni rregullat këtu.

Shfaq Komentet (0)